28 იანვარი 2026 წელი
სიახლეები
28 იანვარი 2026 წელი
27 იანვარი 2026 წელი
2026 წლის 27 იანვარი განსაკუთრებული დღეა მთელი საქართველოსთვის — აღინიშნება საქართველოში ქრისტიანობის სახელმწიფო რელიგიად გამოცხადებიდან 1700 წლისთავი. ეს თარიღი გვახსენებს იმ სულიერ საფუძველს, რომელმაც განსაზღვრა ჩვენი ქვეყნის ისტორია, კულტურა და ეროვნული თვითმყოფადობა. ეს დღე განსაკუთრებით მნიშვნელოვანია ჩვენი სკოლისათვის, რომელიც წმიდა ნინოს სახელს ატარებს. მოციქულთასწორმა წმიდა ნინომ ქრისტეს სარწმუნოება შემოიტანა საქართველოში და სიყვარულით, სიმდაბლითა და ლოცვით შეცვალა ერის ბედი. მისი ღვაწლით მოექცა მეფე მირიანი და დედოფალი ნანა, და საქართველომ ქრისტიანული გზა აირჩია. წმიდა ნინო ჩვენთვის არის რწმენის, სიძლიერის, სიკეთისა და მსახურების მაგალითი. იგი გვასწავლის, რომ ერთი ადამიანის გულწრფელ რწმენასა და ერთგულებას შეუძლია დიდი ცვლილებების მოტანა. ნინოობა ჩვენი სკოლისათვის მხოლოდ ისტორიული თარიღი არ არის — ეს არის დღე, როცა კიდევ ერთხელ ვიაზრებთ, რას ნიშნავს წმიდა ნინოს სახელის ტარება: ვიცხოვროთ სიყვარულით, სიმართლით, ცოდნისკენ სწრაფვით და ერთმანეთის პატივისცემით. ვულოცავთ ნინოობას ჩვენი სკოლის თითოეულ მოსწავლეს, მასწავლებელსა და მშობელს.დაე, წმიდა ნინოს ლოცვა და მაგალითი მუდამ გვაძლიერებდეს.
სრულად
03 იანვარი 2026 წელი
29 დეკემბერს ჩვენს სკოლაში გაიმართა განსაკუთრებულად მხიარული და ემოციებით სავსე წინა საახალწლო ღონისძიება — „კარნავალი 2026“, რომელიც სკოლის თვითმმართველობის მოსწავლეების ორგანიზებით ჩატარდა და ყველასთვის ნამდვილ დღესასწაულად იქცა. მიუხედავად იმისა, რომ ახალი წელი უკვე დადგა, ამ კარნავალის სითბო, ფერები და ემოციები დღემდე თან გვახლავს. ბავშვების სიხარულმა და ენერგიამ განწყობის ნამდვილი ფეიერვერკი შექმნა. ყველაფერი იყო: წითელი ხალიჩა, ფერადი და კრეატიული სამოსი, მუსიკა, ცეკვა, სიმღერა, სკეჩები და პაროდიები. თითოეული გამოსვლა გულდასმით მომზადებული იყო და ნათლად წარმოაჩენდა მოსწავლეთა ნიჭს, თავისუფალ ფიქრსა და შემოქმედებით სილაღეს. დარბაზი სავსე იყო სიცილით, აპლოდისმენტებითა და გულწრფელი ემოციებით. ეს ბავშვები ნამდვილად საამაყონი არიან — ნიჭიერები, თამამები, ინიციატივიანები და თაობათა ღირსეული მემკვიდრეები. მათი სითამამე სცენაზე, იდეების მრავალფეროვნება და ერთმანეთის მხარდაჭერა გვაძლევს რწმენას, რომ ისინი შეძლებენ საკუთარი შესაძლებლობების სრულად რეალიზებას. რაც მეტად გვახარებს მათი შემოქმედება და სიხარული, მით მეტად გვაგრძნობინებს პასუხისმგებლობასაც — შევუქმნათ მათ თავისუფალი თვითგამოხატვის, განვითარების და წინსვლის სივრცე.ღონისძიება სკოლის თვითმმართველობის დიდი მონდომებითა და ორგანიზებულობით განხორციელდა. ბავშვებმა კიდევ ერთხელ დაამტკიცეს, რამდენად მნიშვნელოვანია მათთვის საკუთარი იდეების რეალიზება და სკოლის ცხოვრებაში აქტიური მონაწილეობა. განსაკუთრებული სითბო იგრძნობოდა იმ სიყვარულსა და მადლიერებაში, რომლითაც ღონისძიების დასასრულს მოსწავლეებმა მასწავლებლებს სიმბოლური სიგელები გადასცეს — ეს იყო გულწრფელი ემოციისა და ურთიერთპატივისცემის ლამაზი გამოხატულება. ღონისძიებას განსაკუთრებულად ამშვენებდნენ ჩვენი ახალგაზრდა, ენერგიული და შემოქმედებითი პედაგოგები, რომლებმაც ბავშვებთან ერთად შექმნეს თავისუფალი, მეგობრული და შთამაგონებელი გარემო. სწორედ ასეთი თანამშრომლობა აძლიერებს სკოლის ერთიანობას და ქმნის თბილ, მხარდამჭერ სასწავლო სივრცეს.„კარნავალი 2026“ უკვე წარსულში დარჩენილი დღეა, თუმცა მისი სიხარული, სიცილი და ბავშვური ნათელი თვალები ახალ წელშიც მოგვყვება. ეს იყო დღე, რომელმაც კიდევ ერთხელ შეგვახსენა, რატომ გვიყვარს ჩვენი სკოლა და რატომ არის თითოეული ასეთი შეხვედრა ფასდაუდებელი. გილოცავთ ახალ წელს, ძვირფასო ბავშვებო და კოლეგებო! დაე, ეს სიხარული, შემოქმედებითი მუხტი და გულწრფელი სიყვარული მთელი წლის განმავლობაში თან გდევდეთ.
სრულად
31 დეკემბერი 2025 წელი
მოსწავლეების, მშობლებისა და მასწავლებლების ერთობლივი შრომის, ძალისხმევისა და შემოქმედების შედეგად სკოლაში 23 დეკემბერს გაიმართა საშობაო გამოფენა-გაყიდვა, რომელმაც დიდი ინტერესი და მხარდაჭერა მოიპოვა. გასაყიდად წარმოდგენილი იყო მშობლების მიერ სიყვარულითა და ზრუნვით მომზადებული სხვადასხვა სახის ტკბილეული, საკვები და მრავალი საშობაო გემრიელობა. განსაკუთრებული ყურადღება მიიქცია მოსწავლეთა მიერ შესრულებული ნახატების გამოფენამ, რომლებიც თავდაპირველად მხოლოდ საგამოფენო დანიშნულებით იყო წარმოდგენილი, თუმცა დიდი მოწონების შედეგად, ავტორებთან შეთანხმებით მათი გაყიდვაც გადაწყდა. გამოფენა-გაყიდვის შედეგად შემოსული თანხა მთლიანად ქველმოქმედებას მოხმარდა. გადაწყდა, რომ შეგროვილი თანხით დახმარება ლაზარეთის მოხუცთა თავშესაფარს გასწეოდა, რადგან დღესასწაულების პერიოდში განსაკუთრებით მნიშვნელოვანია იმ ადამიანების მხარდაჭერა, ვინც ხშირად მარტო რჩება. ლაზარეთის მოხუცთა თავშესაფარი დაარსებულია დედა ელენეს მიერ — ადამიანური თანაგრძნობის, ქრისტიანული სიყვარულისა და უანგარო მსახურების ნათელი მაგალითის სახით. დედა ელენემ ეს თავშესაფარი შექმნა იმ ადამიანებისთვის, ვინც ცხოვრების სხვადასხვა ეტაპზე მარტო დარჩა და განსაკუთრებულ ზრუნვას საჭიროებს. მისი თავდადებული შრომისა და რწმენის შედეგად, ლაზარეთი დღეს არა მხოლოდ თავშესაფარია, არამედ სითბოს, მზრუნველობისა და ღირსეული ცხოვრების სივრცე მრავალი მოხუცისთვის. 29 დეკემბერს ჩვენი სკოლის მოსწავლეები და მასწავლებლები თავად ესტუმრნენ ლაზარეთის მოხუცთა თავშესაფარს. შეგროვილი თანხით მათ შეიძინეს სხვადასხვა საჭირო ნივთი — საკვები პროდუქტები, ჰიგიენური საშუალებები, თბილი ტანსაცმელი და სხვა ყოველდღიური მოხმარების საგნები, რომლებიც დიდი სიყვარულითა და ზრუნვით გადაეცათ თავშესაფარში მცხოვრებ ბენეფიციარებს. შეხვედრა სავსე იყო ემოციებით. მოხუცების მადლიერება, თბილი სიტყვები და ღიმილი კიდევ ერთხელ გვახსენებდა, თუ რამდენად მნიშვნელოვანია ერთმანეთის გვერდით დგომა. მოსწავლეებისთვის ეს გამოცდილება ცოცხალი გაკვეთილი გახდა სიკეთეზე, თანაგრძნობასა და სოციალურ პასუხისმგებლობაზე. საშობაო გამოფენა-გაყიდვა მხოლოდ თანხის შეგროვება არ ყოფილა — ეს იყო ერთიანობის, ურთიერთდახმარებისა და ადამიანური ღირებულებების გამოხატულება. ჩვენი სკოლა ამაყობს იმით, რომ ასეთ ინიციატივებში აქტიურად არიან ჩართული მოსწავლეები, რომლებიც სწავლობენ არა მხოლოდ აკადემიურ ცოდნას, არამედ ცხოვრებისთვის მნიშვნელოვან ფასეულობებსაც. მადლობას ვუხდით ყველა იმ ადამიანს, ვინც წვლილი შეიტანა ამ კეთილ საქმეში. ერთად გაკეთებული სიკეთე ყველაზე ლამაზ საჩუქრად იქცა როგორც ლაზარეთის მოხუცთა თავშესაფრის ბინადრებისთვის, ისე ჩვენი სასკოლო საზოგადოების თითოეული წევრისთვის.
სრულად
26 დეკემბერი 2025 წელი
საქართველოს საპატრიარქოს წმინდა ნინოს სახელობის მართლმადიდებლურ სკოლაში მეორე კლასის მოსწავლეებმა მაყურებელს გულწრფელი ემოციებითა და ბავშვური სიხარულით სავსე საახალწლო ზეიმი აჩუქეს. სცენაზე ერთმანეთს ენაცვლებოდა ღიმილი, მხიარული განწყობა და სადღესასწაულო ატმოსფერო, რომელმაც დარბაზი ერთ დიდ ოჯახად აქცია ბავშვებმა დიდი სიყვარულითა და მონდომებით წარმოადგინეს თავიანთი ნომრები და კიდევ ერთხელ დაგვარწმუნეს, რომ შემოქმედება და ერთობლივი შრომა საუკეთესო შედეგს იძლევა. ზეიმი მუსიკალურად გააფორმა მუსიკის მასწავლებელმა ნინო ბიბილურმა. სცენარის ავტორი ინგლისური ენის მასწავლებელი ანა ხელაიაა, რომელმაც ბუნებისმეტყველების მასწავლებელთან ეთო აფციაურთან ერთად ეს თბილი და შთამბეჭდავი ღონისძიება დადგა. ეს დღე მეორე კლასის მოსწავლეებისთვის სიხარულით სავსე მოგონებად დარჩება, ხოლო მაყურებლისთვის — საახალწლო განწყობისა და ბავშვური გულწრფელობის ლამაზ მაგალითად
სრულად
26 დეკემბერი 2025 წელი
საქართველოს საპატრიარქოს წმინდა ნინოს სახელობის მართლმადიდებლურ სკოლაში პირველკლასელებმა ნამდვილ ზღაპარში გვამოგზაურეს. სცენაზე გაცოცხლდა საახალწლო სითბო, სიხარული და ბავშვური გულწრფელობა, რომელმაც მაყურებელი პირველივე წუთებიდანვე მოაჯადოვა. პატარების გულწრფელმა ღიმილმა, მონდომებამ და ენთუზიაზმმა კიდევ ერთხელ შეგვახსენება, რამდენად მნიშვნელოვანია პირველი სასკოლო ნაბიჯები სიყვარულითა და სიხარულით იყოს სავსე. ზეიმი მუსიკალურად გააფორმა მუსიკის მასწავლებელმა ნინო ბიბილურმა, ხოლო დადგმა განახორციელა პირველი კლასის დამრიგებელმა და ქართული ენისა და ლიტერატურის მასწავლებელმა თამარ თაქთაქიშვილმა. ეს დღე პირველკლასელებისთვის დაუვიწყარ მოგონებად დარჩება, ხოლო ჩვენთვის — ბავშვური სიხარულის ყველაზე სუფთა და ნათელ გამოხატულებად
სრულად
23 დეკემბერი 2025 წელი
4ა კლასის დამრიგებლის, ელენე მიროტაძის ორგანიზებით, სკოლაში მოეწყო თბილი და სიხარულით სავსე საშობაო გამოფენა-გაყიდვა, რომელმაც კიდევ ერთხელ წარმოაჩინა ჩვენი სასკოლო საზოგადოების ერთიანობა, შემოქმედებითი სული და ქველმოქმედების მნიშვნელობა. ღონისძიებაში აქტიური მონაწილეობა მიიღეს არა მხოლოდ 4ა კლასის მოსწავლეებმა, არამედ სხვა კლასების ბავშვებმაც, რამაც გამოფენა-გაყიდვას განსაკუთრებული მასშტაბი და მრავალფეროვნება შესძინა. განსაკუთრებით აღსანიშნავია 6ა კლასის მოსწავლეებისა და მათი დამრიგებლის, ანა ხელაიას თანადგომა და აქტიური მონაწილეობა. საგამოფენო სივრცე სავსე იყო სადღესასწაულო განწყობით, ბავშვების სიხარულითა და სტუმრების ინტერესით. გასაყიდად წარმოდგენილი იყო მშობლების მიერ სიყვარულითა და ზრუნვით მომზადებული სხვადასხვა სახის ტკბილეული და საკვები: ნამცხვრები, დონატები, ფელამუში, ჩურჩხელა, ქათმის ბურგერები და მრავალი სხვა საშობაო გემრიელობა . თითოეულ დახლს თან ახლდა ბავშვების ენთუზიაზმი და სურვილი, საკუთარი წვლილი შეეტანათ კეთილ საქმეში. განსაკუთრებული ყურადღება მიიქცია მოსწავლეთა მიერ შესრულებული ნახატების გამოფენამ, რომელიც მოეწყო ხატვის მასწავლებლების — ქეთევან დევნოზაშვილისა და ნინო ცარციძის ხელმძღვანელობით. თავდაპირველად ნამუშევრები მხოლოდ საგამოფენო დანიშნულებით იყო წარმოდგენილი, თუმცა სტუმრების მხრიდან დიდი მოწონება და ინტერესი იმდენად მაღალი აღმოჩნდა, რომ ნახატების ავტორებთან შეთანხმებით მათი გაყიდვაც გადაწყდა. ეს გადაწყვეტილება ბავშვებისთვის კიდევ ერთი მნიშვნელოვანი გაკვეთილი გახდა – როგორ შეიძლება შემოქმედება სიკეთის სამსახურში ჩადგეს. მთლიანი შემოსული თანხა ქველმოქმედებას მოხმარდება, რაც ღონისძიებას განსაკუთრებულ მნიშვნელობას ანიჭებს. საშობაო გამოფენა-გაყიდვა იქცა არა მხოლოდ სადღესასწაულო აქტივობად, არამედ სიკეთის, თანადგომისა და სოციალური პასუხისმგებლობის ცოცხალ მაგალითად. აღნიშნული ინიციატივა ნათლად აჩვენებს, რამდენად მნიშვნელოვანია სკოლის, მასწავლებლების, მოსწავლეებისა და მშობლების თანამშრომლობა საერთო ღირებულებების გასაზიარებლად და მომავალი თაობის სწორად აღსაზრდელად. ასეთი ღონისძიებები ბავშვებს უყალიბებს გულმოწყალებას, პასუხისმგებლობას და ერთმანეთის მხარდაჭერის სურვილს – იმ ფასეულობებს, რომლებიც საშობაო სულისკვეთების არსს წარმოადგენს.
სრულად
23 დეკემბერი 2025 წელი
საქართველოს საპატრიარქოს წმინდა ნინოს სახელობის მართლმადიდებლური სკოლაში სტუდია „რამპას“ პატარა მსახიობებმა მაყურებლის წინაშე სპექტაკლი „სათაგური“ წარმოადგინეს. დადგმა ვაჟა-ფშაველას შემოქმედებაზე იყო აგებული და ერთი კონკრეტული მოთხრობით არ შემოიფარგლებოდა - იგი დიდი მწერლის პოეზიასაც მოიცავდა. მსახიობები საოცარი ოსტატობით განასახიერებდნენ თავიანთ როლებს. სცენაზე ნათლად იგრძნობოდა, რომ თითოეულ მათგანს როლი არა მხოლოდ ნასწავლი, არამედ შინაგანად განცდილი ჰქონდა, რასაც მათი ბუნებრივი არტისტიზმიც ამყარებდა. ვაჟა-ფშაველას შემოქმედებას ეზიარო, დიდი ბედნიერებაა, ხოლო სცენაზე მისი პერსონაჟების გაცოცხლება შეძლო - უდიდესი პასუხისმგებლობა, რომელსაც პატარა მსახიობებმა ღირსეულად გაართვეს თავი. სპექტაკლის სცენარის ავტორი და რეჟისორი გახლდათ მარი თაბაგარი,პროდიუსერი - ლალი მელივა,მუსიკალური ხელმძღვანელი - ნინო ბიბილური,ქორეოგრაფი - ნათია ხუჭუა. სცენიდან ისმოდა სიტყვები: „ლამაზად შვილის გამზრდელი დედა მიცვნია ღმერთადა“. სწორედ ეს „ღმერთები“ ისხდნენ დარბაზში - მშობლები, რომელთა თვალებში სიამაყე და სიყვარული ერთად ბრწყინავდა, როცა თავიანთი შვილების ნიჭს ადევნებდნენ თვალს. სპექტაკლს ასევე ესწრებოდნენ ჩვენი სკოლის მოსწავლეები და მასწავლებლები, აგრეთვე - მამა სპირიდონ მუმლაძე, რომელმაც დალოცა პატარა მსახიობები და ბედნიერი ახალი წელი უსურვა. დაე, სიკეთე და ბედნიერება არასოდეს მოშლოდეს მთელი მსოფლიოს ბავშვებს.
სრულად
22 დეკემბერი 2025 წელი
ჩვენი სკოლის IIIა და IIIბ კლასის მოსწავლეებთან ბუნებისმეტყველების გაკვეთილები „სწავლა–კეთებით“ პრინციპით წარიმართა. თემაზე „მზე და მთვარე“ მოსწავლეებმა აქტიურად იმუშავეს და სხვადასხვა პრაქტიკული აქტივობა განახორციელეს. გაკვეთილის ფარგლებში მოსწავლეებმა: შექმნეს მზის სისტემისა და მთვარის ფაზების მოდელები; დააკვირდნენ მათ ფორმასა და ფერს, ისაუბრეს ციური სხეულების მნიშვნელობაზე ბუნებაში; იმსჯელეს დღის და ღამის მონაცვლეობაზე; შექმნეს თემატური ნახატები და წარადგინეს მცირე პრეზენტაციები; მოაწყვეს „ჩრდილების თეატრი“, სადაც ციური სხეულების მოდელებისა და სინათლის წყაროს გამოყენებით დააკვირდნენ ჩრდილის ფორმისა და ზომის ცვლილებას. განხორციელებული აქტივობების საშუალებით მოსწავლეებმა უკეთ გაიაზრეს სამყაროს აგებულება და ციური სხეულების როლი ადამიანის ცხოვრებაში. სასწავლო პროცესი იყო საინტერესო, შემოქმედებითი და პრაქტიკულ გამოცდილებაზე დაფუძნებული, რაც მოსწავლეთა ჩართულობას კიდევ უფრო ზრდიდა. გაკვეთილი ჩაატარა მასწავლებელმა ნათია ხუჭუამ, რომლის ხელმძღვანელობითაც მოსწავლეები დიდი ინტერესითა და აქტიურობით მუშაობდნენ. მსგავსი გაკვეთილები ხელს უწყობს მოსწავლეთა შემეცნებითი ინტერესის ზრდას, დაკვირვების, ანალიზისა და დამოუკიდებელი აზროვნების უნარების განვითარებას.
სრულად
16 დეკემბერი 2025 წელი