27 თებერვალი 2026 წელი
სიახლეები
27 თებერვალი 2026 წელი
27 თებერვალი 2026 წელი
წარმოგიდგენთ მათემატიკის ოლიმპიადა „ევერესტის“ საშემოდგომო სეზონის II–IV კლასის მოსწავლეთა სიგელებსა და სერტიფიკატებს. ჩვენი პატარა მათემატიკოსები ღირსეულად აგრძელებენ წარმატების ტრადიციას და კიდევ ერთხელ ამტკიცებენ, რომ შრომა და მონდომება ყოველთვის ფასდება. ვულოცავთ მათ ამ მიღწევას და ვუსურვებთ მომავალშიც მრავალ წარმატებას!
სრულად
26 თებერვალი 2026 წელი
ჩვენი სკოლის მეშვიდე კლასის მოსწავლეები გეოგრაფიის გაკვეთილზე გაეცნენ დედამიწის ერთ-ერთ ყველაზე შთამბეჭდავ და ძლიერ ბუნებრივ მოვლენებს – ვულკანებსა და გეიზერებს. მათ იმსჯელეს, როგორ წარმოიქმნება ვულკანი, რა იწვევს ამოფრქვევას, რა განსხვავებაა აქტიურ, ჩამქრალ და მიძინებულ ვულკანებს შორის და რა როლი აქვს ამ პროცესებს დედამიწის რელიეფის ფორმირებაში. განსაკუთრებული ყურადღება დაეთმო მსოფლიოში ცნობილ გეიზერს – Old Faithful, რომელიც მდებარეობს Yellowstone National Park-ში და ცნობილია თავისი რეგულარული ამოფრქვევით. მოსწავლეებმა გაიგეს, როგორ მუშაობს გეიზერი, რა პირობებია საჭირო მის წარმოსაქმნელად და რატომ არის იგი უნიკალური ბუნებრივი მოვლენა. გაკვეთილზე ასევე იმსჯელეს, როგორ იყენებს ადამიანი გეოთერმულ ენერგიას თანამედროვე სამყაროში: ელექტროენერგიის წარმოებაში საცხოვრებელი სახლებისა და საზოგადოებრივი შენობების გათბობაში სათბურ მეურნეობაში სამკურნალო-ბალნეოლოგიურ კურორტებზე თემის უკეთ გასაგებად და ცოდნის გასაღრმავებლად მოსწავლეებმა მოამზადეს საინტერესო და მრავალფეროვანი პრეზენტაციები. განსაკუთრებული ინტერესი გამოიწვია საკუთარი ხელით შექმნილმა ვულკანისა და გეიზერის მაკეტებმა, რომლებიც მოსწავლეებმა „გააცოცხლეს“ როგორც ვირტუალურად, ისე ხელოვნურად შექმნილი მოდელების საშუალებით. მათ შეძლეს ბუნებრივი პროცესების თვალსაჩინოდ და შემოქმედებითად წარმოჩენა. ამ აქტივობამ მოსწავლეებს შესაძლებლობა მისცა, თეორიული ცოდნა პრაქტიკულ გამოცდილებასთან დაეკავშირებინათ და განევითარებინათ კვლევითი, შემოქმედებითი და პრეზენტაციის უნარები. სწავლა ყველაზე შედეგიანია მაშინ, როდესაც ცოდნა ინტერესსა და შემოქმედებითობას ერწყმის!
სრულად
20 თებერვალი 2026 წელი
30 იანვარს თეატრალური დასი ,,რამპა", სპექტაკლით ,,ჰელადოსი", წარსდგა ბაკურიანში თეატრალურ ფესტივალზე, საიდანაც შთაბეჭდილებების გარდა, რვა ნომინაციაც წამოიღო. ეს იყო დიდი ღელვა და განცდა, რადგან პრემიერა ყოველთვის ჰგავს პირველ აღსარებას, რომელიც გულიდან ამოდის და არ იცი, როგორ მიიღებენ.თუმცა ნამდვილი გამოცდა წინ იყო... 13 თებერვალს თეატრალებმა ახალი პასუხისმგებლობა და გამოწვევა მიიღეს. სპექტაკლი ყველაზე კრიტიკული შემფასებლების - თანატოლებისა და მშობლებისთვის წარედგინათ. კიდევ უფრო ემოციის მომტანი იყო ის, რომ სპექტაკლს პატივსაცემი სტუმრებიც უნდა დასწრებოდნენ - ქალბატონი ქეთი დუმბაძე და მანონ ბულესკირია. დასის სამხატვრო ხელმძღვანელი, სპექტაკლის სცენარის ავტორი და რეჟისორი აღნიშნავს: ,,ხმის ოპერატორის პულტთან მჯდომი, ზურგით მაყურებლისკენ, სცენას თვალს არ ვაშორებდი. მაშინ, როცა ჯემალი ელენა მიხაილოვნას ლოდინში აკვარიუმს შენიშნავს და თევზებს მიუალერსებს, პირველად გავაპარე მზერა ახარხარებული მაყურებლისკენ. მეორედ კი - ატირებული ჯემალი რომ დეიდა ნინას იანგულის დაბრუნებას აუწყებს. დარბაზში იდგა სიჩუმე, ცრემლის მომასწავებელი და წინამძღოლი. ამ სიცილსა და ცრემლში დაიბადა ყველაზე მნიშვნელოვანი შეგრძნება - სპექტაკლი შედგა". ქალბატონი ქეთი დუმბაძე ჩვეული სიყვარულით მოეფერა პატარა მსახიობებს. გაიხსენა მამა და ,,ჰელადოსის" შექმნის ისტორია. მის ხმაში ირეკლებოდა ბავშვობის ბედნიერი წლების მონატრებაცა და მამისადმი განსაკუთრებული დამოკიდებულებაც. ან კი რა გასაკვირია, ჩვენც ხომ ასე გვიყვარს მწერალი ნოდარ დუმბაძე, რომლის ყოველი ნაწარმოები ქართული ლიტერატურის განძია. სიყვარულითვე მიმართა ბავშვებს პოეტმა და მხატვარმა მანონ ბულესკირიამ. მის სიტყვებში ანათებდა სოხუმის მზე - თბილი, ნაზი, ოდნავ სევდიანი. თითქოს სცენაზე მხოლოდ სპექტაკლი კი არა, წარსული გაცოცხლდა. მადლობა ჩვენს ძვირფას სტუმრებს ამ ლამაზი დღისთვის!
სრულად
20 თებერვალი 2026 წელი
საქართველოს საპატრიარქოს წმიდა ნინოს სახელობის მართლმადიდებლურ სკოლაში 2026 წლის 18 თებერვალს XI კლასში ჩატარდა ღია გაკვეთილი ქართულ ენასა და ლიტერატურაში, რომელსაც ესწრებოდა სკოლის დირექტორი ქალბატონი ლალი მელივა. მასწავლებელმა მარინა ტოხიშვილმა მოსწავლეებთან ერთად შეაჯამა ილია ჭავჭავაძის შემოქმედება. გაკვეთილის მსვლელობისას თანდათან გამოიკვეთა მთავარი საკითხები. იმსჯელეს პირფერობაზე, უსაქმურობასა და სიზარმაცეზე, განათლებასა და სამართლიანობაზე. საინტერესო აღმოჩნდა მსჯელობა მოსაზრებაზე ,,მოყვარეს პირში უძრახე, მტერს პირს უკანაო". განიხილეს ილიას პუბლიცისტიკა, პატრიოტიზმი, პოეტისა და პოეზიის დანიშნულება. მოსწავლეებმა კიდევ ერთხელ გაიხსენეს ილიას დამოკიდებულება ადამიანის ცხოვრების გზაზე, საზოგადოების წევრთა შორის ხიდჩატეხილობასა და გაუცხოებაზე. საკითხები დაუკავშირეს დღევანდელობას და იმსჯელეს თიოეულის აქტუალობაზე XXI საუკკუნეში. გაკვეთილის დასასრულს მოსწავლეები შეთანხმდნენ, რომ ილიას გზა გზაა უფლის, სამართლიანობის, ადამიანური ღირსებისა და სამშობლოს სიყვარულის; რომ ენის, მამულისა და სარწმუნოების დაცვა ახლა მათი ვალი და პასუხისმგებლობაა.
სრულად
09 თებერვალი 2026 წელი
წიგნის კითხვის კვირეულმა ჩვენს სკოლაში განსაკუთრებული მასშტაბი და სულიერი მნიშვნელობა შეიძინა. მართალია, მოსწავლეები კლასგარეშე ლიტერატურას პერიოდულად გაკვეთილებზეც კითხულობენ და განიხილავენ, მაგრამ წიგნის საჯაროდ კითხვის კვირეული (განსაკუთრებით კი 4 თებერვალი) ნამდვილ დღესასწაულად იქცა. ეს ხომ დღეა, რომელიც მსოფლიოს ასზე მეტ ქვეყანაში აღინიშნება და ერთ დიდ იდეას აერთიანებს: „იკითხე ხმამაღლა, შეცვალე მსოფლიო“. „დედამიწა არის მზითა და მთვარით განათებული დიდი წიგნი, სადაც უამრავი ცოცხალი მოთხრობა დადის,“ - ამბობდა გოდერძი ჩოხელი. სწორედ ამ სიტყვების ცოცხალ გაგრძელებად იქცნენ ჩვენი მოსწავლეებიც: ისინი თითქოს თავად იყვნენ მოთხრობების პერსონაჟები და წიგნებს კიდევ უფრო დიდი გულისყურით მიუსხდნენ. ქართული ენისა და ლიტერატურის მასწავლებელმა, მარი თაბაგარმა, თითოეულ კლასში თემატურად გაანაწილა მხატვრული ლიტერატურა, რათა კითხვის პროცესი ასაკთან და ინტერესებთან თანხვედრაში ყოფილიყო: IIIა კლასის მოსწავლეებმა ქართული ხალხური ზღაპრები გაიხსენეს და კიდევ ერთხელ იზეიმეს სიკეთის გამარჯვება ბოროტებაზე - იმ მარადიული ჭეშმარიტების, რომელსაც ბავშვური გულწრფელობითა და რწმენით ეზიარებიან. VIბ კლასის მოსწავლეები გოდერძი ჩოხელის მოთხრობებს ჩაუღრმავდნენ - დაახასიათეს საოცარი პერსონაჟები, ისაუბრეს მათ შინაგან ბრძოლაზე; გაიმართა დისკუსია, სადაც აზრი აზრს მოსდევდა, ეხმიანებოდა. VIIა კლასში საპროგრამო მასალა (ერთი თავი) მგელსა და არწივზე სამეცნიერო და მხატვრულ ტექსტებს მოიცავს, ამიტომაც ვაჟა-ფშაველას „ამოდის, ნათდება“ განსაკუთრებით თემატური აღმოჩნდა. ბავშვებმა ბებერ ტოტიას ტკივილი იგრძნეს, მგლების ცხოვრების მცირე ეპიზოდში კი დაინახეს, როგორ ებღაუჭება გაჭირვებაში ადამიანი თუ ნებისმიერი სულიერი მცირე იმედს, რა მძიმეა მისი დაკარგვა და როგორ ცოცხლდება სამყარო მაშინ, როცა მზე კვლავ „ამოდის, ნათდება“. VIIIა კლასის ლიტერატურის სახელმძღვანელოს ერთი თავი ქართული ლირიკის გამორჩეულ ნიმუშებს აერთიანებს. ხოლო 4 თებერვალს მოსწავლეები მურმან ლებანიძის კრებულებს მიუსხდნენ და საკლასო ოთახი მისი პოეზიის სიღრმითა და ემოციით აავსეს: „რა დროს ლექსიაო, მოუკვდა პატრონი!ხმლით შემოვარდნილა ერეკლე-ბატონი...ამას მოჰყოლია: „ვაჰ, დრონი! ვაჰ, დრონი!“ჩემო თვალნათელო, ჩემო ფრთანათელო,ოდესმე დიდი ყოფილა საქართველო!“ სწორედ სამშობლოს სიყვარულია ის მთავარი ძალა, რომელიც ადამიანს წიგნის სამყაროსკენ უბიძგებს. რადგან სამშობლოს ყველაზე მეტად სჭირდება წიგნიერი, განათლებული და მოაზროვნე ადამიანები, რომლებიც კითხულობენ, ფიქრობენ და სამყაროს უკეთესს ქმნიან.
სრულად
06 თებერვალი 2026 წელი
სიხარულით გაცნობებთ, რომ ჩვენი სკოლის მოსწავლეებმა გამორჩეული შედეგები აჩვენეს საგანმანათლებლო პროექტ „ეტალონის“ 2025 წლის შემოდგომის სეზონის საგნობრივ ოლიმპიადებში. განსაკუთრებით ვამაყობთ ჩვენი მოსწავლეების მიღწევებით: დაჩი გაგოშიძე – IV კლასი - ქართული ენისა და ლიტერატურის ოლიმპიადა - ლიდერთა ათეული ნინო ბენდელიანი – II კლასი - ლოგიკური აზროვნებისა და ზოგადი განათლების ოლიმპიადა - ლიდერთა ათეული ოლიმპიადაში მონაწილეობდა 4000-ზე მეტი მოსწავლე მთელი საქართველოდან, ხოლო გამორჩეული შედეგების მქონე მოსწავლეები სპეციალური დიპლომებით დაჯილდოვდნენ. ჩვენი მოსწავლეების წარმატება ნათლად აჩვენებს მათ მონდომებას, ცოდნასა და მაღალი დონის მომზადებას. ვულოცავთ ჩვენს პატარა გამარჯვებულებს და ვუსურვებთ კიდევ ბევრ წარმატებას!
სრულად
04 თებერვალი 2026 წელი
4 თებერვალს, წიგნის საჯაროდ კითხვის დღესთან დაკავშირებით, გაკვეთილი განსაკუთრებულად საინტერესო და შთამბეჭდავი გამოვიდა. ქართული ენისა და ლიტერატურის მასწავლებლის, ლეილა თვალაბეიშვილის ხელმძღვანელობით, მოსწავლეებმა ისაუბრეს წიგნებზე და ეწვივნენ ჩვენი სკოლის ბიბლიოთეკას. ბავშვები გაეცვნენ ბიბლიოთეკაში ქცევის წესებს, მოისმინეს გიორგი ლეონიძის ნაწარმოები — „წიგნი“, და ერთად დაფიქრდნენ, რატომ არის წიგნი „ყველაზე კარგი მოსაუბრე“ და „მძიმე ტვირთი, ოღონდ ადვილი სატარებელი“.გაკვეთილი დატვირთული იყო სახალისო აქტივობებით — გამოცანების კითხვითა და ასობგერების სწორად გადანაცვლებით, რამაც კითხვა კიდევ უფრო საინტერესო გახადა. მოსწავლეები დარწმუნდნენ, რომ „სწავლა სინათლეა, უსწავლელობა კი — სიბნელე“, „უწიგნოდ თვალთახედვის ისარი მოკლეა“, „ცოდნაზე უკეთესი ცისქვეშეთში არაფერია, მას ვერც მოგპარავენ და ვერც წაგართმევენ“, „ცოდნა ხომ თან დასდევს მცოდნელს“. გაკვეთილი მურმან ლებანიძის ლექსით დასრულდა: „არა ასი და ათასი — წიგნს უქცევია კაცად…“
სრულად
03 თებერვალი 2026 წელი
წიგნის საჯაროდ კითხვის კვირეულის ფარგლებში, 2 თებერვალს მე-5ა კლასში ქართული ენისა და ლიტერატურის გაკვეთილი განსაკუთრებულად შემოქმედებითი აღმოჩნდა. მოსწავლეებმა, მასწავლებელ გვანცა ტალახაძის ხელმძღვანელობით, წაიკითხეს ეკატერინე გაბაშვილის უკვდავი მოთხრობა — „მაგდანას ლურჯა“, რის შემდეგაც სცადეს „წიგნის გაცოცხლება“.ბავშვებმა ნაწარმოებიდან თავად აირჩიეს სცენები და სიტყვების გარეშე, მხოლოდ ჟესტებითა და მიმიკებით, წარმოადგინეს პერსონაჟების ემოციები და განწყობები. აქტივობამ კიდევ ერთხელ დაგვანახა, რამდენად ღრმად შეიძლება წიგნის განცდა, როცა კითხვა ფანტაზიასა და შემოქმედებითობას ერწყმის. წიგნი ბავშვებისთვის ცოცხლდება მაშინ, როცა ისინი მას გულით კითხულობენ.
სრულად
29 იანვარი 2026 წელი