30 მაისი 2025 წელი
სიახლეები
30 მაისი 2025 წელი
26 მაისი 2025 წელი
საქართველოს საპატრიარქოს წმინდა ნინოს სახელობის მართლმადიდებლური სკოლის თეატრალურმა დასმა „რამპა“,მარი თაბაგარის რეჟისორობითა და სცენარით, წარმატებით გახსნა თეატრალური ფესტივალი „ქიზიყი 2025“ სიღნაღში, სპექტაკლით „ჩემო კარგო ქვეყანავ“. ეს ღონისძიება, რომელიც 24 მაისს გაიმართა, ნამდვილ მოვლენად იქცა ახალგაზრდა მსახიობებისთვის და ოთხი მნიშვნელოვანი ნომინაცია მოუტანა დასს. სპექტაკლი, რომელიც საათსა და ოცდახუთ წუთში ილია ჭავჭავაძის ცხოვრებასა და შემოქმედებას აერთიანებდა, დიდი შრომისა და თავდადების ნაყოფი იყო. მარი თაბაგარისა და ლალი მელივას ხელმძღვანელობით, „რამპას“ მსახიობებმა შეძლეს ილიას ეპოქის სრულფასოვანი გადმოცემა, მაყურებელს კი საკუთარივით გაუზიარეს ილიასეული საფიქრალ-საზრუნავი, ცენზურა და ერის ბედი. სპექტაკლი არა მხოლოდ ილიას ცხოვრების ქრონიკა იყო, არამედ მისი შემოქმედების ღრმა ინტერპრეტაცია, სადაც თითოეული პერსონაჟი, ილია ჭავჭავაძიდან დაწყებული ოთარაანთ ქვრივით დამთავრებული, მთელი ეპოქის წარმომჩენად იქცა. ფესტივალზე გამოსვლა „რამპას“ პატარა მსახიობებისთვის უცხო გარემო იყო, თუმცა მათ შესანიშნავად გაართვეს თავი და, როგორც რეჟისორი აღნიშნავს, დიდ სცენაზე მათი „ნათლობაც“ შედგა. მარი თაბაგარი განსაკუთრებული სიამაყით საუბრობს მთავარი როლის შემსრულებელ - დასის დინჯსა და დარბაისელ წევრზე ილია წიკლაურზე. ასევე აღსანიშნავია შეყვარებული ოლღას, ტრაგიზმით სავსე ქვრივი ცოლის, ელისაბედ ჭავჭავაძის, ეკატერინე ჭავჭავაძის, ეკატერინე გაბაშვილის, ნინო პოლტორაცკაიას, გიგა ყიფშიძის, იაკობ მანსვეტაშვილის, ვაჟა-ფშაველას, მკაცრი ოთარაანთ ქვრივის, ლელთ ღუნიას, ლუარსაბისა და დარეჯანის, ასევე მკვლელის როლების ოსტატური შესრულება. „ჩემო კარგო ქვეყანავ“ ოთხი ნომინაციის მფლობელი გახდა, რაც დასის შრომისა და ნიჭის აღიარებაა: ვაჟის საუკეთესო როლი - ილია წიკლაური (ილია ჭავჭავაძე) გოგონას მეორეხარისხოვანი საუკეთესო როლი - მარიამ ანთიძე (ელისაბედ ჭავჭავაძე) საუკეთესო ფოლკლორი სპექტაკლში - „ჩემო კარგო ქვეყანავ“ (მუსიკალური ხელმძღვანელი: ნინო ბიბილური) ლიტერატურული ნაწარმოების საუკეთესო ინტერპრეტაცია - თეატრალური დასი „რამპა“. მარი თაბაგარი მადლობას უხდის ყველას, ვინც სპექტაკლის შექმნასა და წარმატებაში წვლილი შეიტანა. მან განსაკუთრებით გამოყო ქორეოგრაფი ნათია ხუჭუა და სპექტაკლის პროდიუსერი, ქალბატონი ლალი მელივა, რომელმაც „დაუვიწყარი დღეები“ აჩუქა დასს. ფესტივალის ორგანიზატორებსა და სიღნაღის მერიას, ასევე, მადლობა მონაწილეებისთვის შექმნილი დაუვიწყარი გამოცდილებისთვის. მარი თაბაგარმა მადლობა გადაუხადა ბატონ მურად ვაშაკიძეს პროფესიული რჩევებისთვის, მერის მოადგილეს კულტურის, სპორტისა და სოციალურ საკითხებში, ბატონ გოჩა ვარდიაშვილს, ქალბატონ თეა დავითაიას და ფესტივალის წამყვანსა და ორგანიზატორს, ბატონ ხვიჩა ახალაიას. მარი თაბაგარმა ხაზგასმით აღნიშნა სპექტაკლის პირველი შემფასებლების როლი, რომლებმაც ობიექტური და ფასეული შეფასებები მისცეს: პროფესორი, თბილისის კულტურის სამინისტროს წარმომადგენელი, ბატონი იოსებ ჭუმბურიძე, პოეტი და პროფესორი, ქალბატონი ქეთევან შენგელია და პოეტი ეკა ქაჯაია. მათი სიტყვები, მარი თაბაგარის თქმით, „მარგალიტებად აიკინძა გონებაში“. სპექტაკლი „ჩემო კარგო ქვეყანავ“ არა მხოლოდ ახალგაზრდა ტალანტების წარმატებული დებიუტი იყო, არამედ ილია ჭავჭავაძის უკვდავი შემოქმედების კიდევ ერთი აღორძინება სცენაზე, რამაც მაყურებლისა და კრიტიკოსების დიდი მოწონება დაიმსახურა.
სრულად
21 მაისი 2025 წელი
საქართველოს საპატრიარქოს წმინდა ნინოს სახელობის მართლმადიდებლურ სკოლაში კლასთა შორის ფეხბურთის დაძაბული და ემოციებით სავსე შეჯიბრი გაიმართა.მოედანზე ერთმანეთს მე-8, მე-9, მე-10 და მე-11 კლასის გუნდები დაუპირისპირდნენ და ნამდვილი სანახაობა შემოგვთავაზეს. მატჩებს ობიექტურად და პროფესიონალურად მსაჯობდა ჩვენი ფიზიკური აღზრდისა და სპორტის მასწავლებლები, ბექა კვარაცხელია და ქეთი მიქელაძე, რისთვისაც მათ განსაკუთრებული მადლობა! თამაშები სავსე იყო ლამაზი კომბინაციებით, თავდაუზოგავი ბრძოლით და, რა თქმა უნდა, ულამაზესი გოლებით. გულშემატკივრები აქტიურად უჭერდნენ მხარს თავიანთ ფავორიტებს, რაც დამატებით მუხტს სძენდა შეხვედრებს. დაძაბული ბრძოლის შემდეგ, ჩემპიონის ტიტული მე-10 კლასის გუნდმა მოიპოვა! ვულოცავთ ჩვენს გამარჯვებულებს დამსახურებულ ტრიუმფს! გიორგი ფილფანი ანდრია რუსია მახო წვერიკმაზაშვილი გეგა ერგემლიძე მათე ხიდაშელი ალექსანდრე ჩივაძე მათ მართლაც იბრძოლეს ბოლომდე და აჩვენეს ნამდვილი გუნდური სულისკვეთება.სკოლაში მსგავსი სპორტული ღონისძიებები გაცილებით მეტია, ვიდრე უბრალოდ თამაში. მათ უდიდესი მნიშვნელობა აქვთ მოსწავლეების განვითარებისთვის. მოხარულები ვართ, რომ ჩვენს სკოლაში ასეთი ნიჭიერი და აქტიური ახალგაზრდები იზრდებიან! იმედი გვაქვს, რომ მომავალშიც კიდევ ბევრ საინტერესო სპორტულ ღონისძიებას ვიხილავთ.
სრულად
20 მაისი 2025 წელი
ძვირფასო კურსდამთავრებულებო, მშობლებო, კოლეგებო! დღეს ჩვენი სკოლის ისტორიის კიდევ ერთი ფურცელი გადავშალეთ, კიდევ ერთი კლასის მოსწავლეებს ვუშვებთ ცხოვრების რთულ გზაზე, რაც ერთდროულად საამაყოცაა და სასიხარულოც! ბედნიერი ვარ, რომ თქვენმა ზრდა-განვითარებამ ჩვენ თვალწინ გაიარა. ეს იყო რთული, შრომატევადი და იმედით სავსე პროცესი. გასწავლეთ სიკეთის, ადამიანობის, განათლების ფასი და მჯერა, რომ ჩვენს ქვეყანას ღირსეულ თაობას ვუზრდით. მინდა გითხრათ, რომ ცხოვრება მარტივი არაა. ის უამრავ ცდუნებას გვთავაზობს. იყავით ძლიერები! ნუ დაივიწყებთ ოცნებებს, დაისახეთ რეალური მიზნები და იბრძოლეთ მათ შესასრულებლად. მინდა, თითოეული თქვენთაგანი იყოს ბედნიერი. ნუ დაუწყებთ ძებნას ბედნიერებას სადმე სხვაგან, ის არც მარტო ფულშია და არც კარიერაში. იყავით ადამიანები: გიხაროდეთ სხვისი სიხარული და გტკიოდეთ სხვისი ტკივილი! ნუ ივლით ქვეყნად ღირსების გარეშე! არ დაგავიწყდეთ, რომ სამშობლოში ოჯახის სახე ხართ და მის გარეთ ქვეყვის წარმომადგენელი! მინდა ღირსეულად ატაროთ ტვირთი, რომელიც უფალმა განგისაზღვრათ! დროა ზარები შევცვალოთ ცხოვრების მელოდიით, აღარ არის საშინაო დავალებები, მაგრამ იწყება ახალი გამოწვევები, თამამად გადადგით ნაბიჯი, არ შეგეშინდეთ დიდი მიზნების, იარეთ თავდაჯერებით და სიყვარულით! და ბოლოს, მინდა შეგახსენოთ გენიალური სიტყვები: „ადამიანისათვის ყველაზე ძვირფასი სიცოცხლეა, სიცოცხლე მას ეძლევა მხოლოდ ერთხელ და საჭიროა ისე იცხოვრო, რომ მწვავედ არ გტკიოდეს გული უმიზნოდ გატარებული წლების გამო“. ღმერთმა წარმატება და ბედნიერი დღეები გიმრავლოთ! უფალი გფარავდეთ!!- ლალი მელივაა(ა)იპ საქართველოს საპატრიარქოს წმინდა ნინოს სახელობის მართლმადიდებლური სკოლის დირექტორი
სრულად
20 მაისი 2025 წელი
საქართველოს საპატრიარქოს წმინდა ნინოს სახელობის მართლმადიდებლური სკოლის უფროსკლასელები და პედაგოგები ერთ-ერთ ულამაზეს და ისტორიულად უმნიშვნელოვანეს მხარეს - იმერეთს ესტუმრნენ. ამ აქტივობას მრავალმხრივი მნიშვნელობა აქვს ისტორიული და კულტურული განათლების მიმართულებით. ბაგრატის ტაძარი საქართველოს ოქროს ხანის სიმბოლოა. მისი მონახულება მოსწავლეებს საშუალებას აძლევს გაეცნონ ჩვენი ქვეყნის წარსულს: ბაგრატ III-ის ისტორიას, რომელმაც გააერთიანა საქართველო. ეს ცოდნა ხელს უწყობს ეროვნული თვითშეგნების ამაღლებასა და ისტორიისადმი პატივისცემის გაღვივებას. მოწამეთას მონასტერი: ეს ადგილი უკავშირდება დავით და კონსტანტინე მხეიძეების ტრაგიკულ ისტორიას, რომლებმაც ქრისტიანული სარწმუნოებისთვის თავი გასწირეს. მონასტრის მონახულება მოსწავლეებს საშუალებას აძლევს, გაიაზრონ რელიგიის მნიშვნელობა ჩვენს ისტორიაში, გაეცნონ წმინდანთა ცხოვრებას. პრომეთეს მღვიმე: უნიკალური ბუნებრივი ძეგლი მოსწავლეებს აძლევს შესაძლებლობას, გაეცნონ საქართველოს ბუნების საოცრებებს. მღვიმის სტალაქტიტებისა და სტალაგმიტების ფორმები, მიწისქვეშა მდინარე და ტბები მათ წარმოდგენას შეუქმნის დედამიწის გეოლოგიურ პროცესებზე და ბუნებრივი გარემოს დაცვის მნიშვნელობაზე. ზოგადად, თანაკლასელებთან და მასწავლებლებთან ერთად მოგზაურობა ხელს უწყობს მოსწავლეებს შორის მეგობრული და თბილი ურთიერთობების ჩამოყალიბებას. ისინი სწავლობენ გუნდურად მუშაობას, ერთმანეთის დახმარებასა და საერთო გამოცდილების გაზიარებას. ახალ გარემოში ყოფნა და უცნობი ადგილების აღმოჩენა ავითარებს მოსწავლეების ცნობისმოყვარეობას, დაკვირვების უნარსა და ადაპტაციის უნარს. ეს მოგზაურობა შესაძლოა გახდეს იმპულსი მოსწავლეებისთვის, უფრო ღრმად შეისწავლონ საქართველოს ისტორია და ბუნება. მიღებული შთაბეჭდილებები და ცოდნა დაეხმარებათ მოქალაქეობრივი კულტურის ამაღლებაში. მსგავსი ექსკურსიები უაღრესად მნიშვნელოვანია სასწავლო პროცესის გასამდიდრებლად და მოსწავლეების ჰოლისტური განვითარებისთვის. იმერეთში მიღებული გამოცდილება მათ დიდხანს დარჩებათ მეხსიერებაში და დადებითად აისახება მათ მსოფლმხედველობაზე.
სრულად
17 მაისი 2025 წელი
სიღნაღში, 24-25 მაისს, თეატრალური ფესტივალი ,,ქიზიყი 2025" გაიმართება. ჩვენი სკოლის თეატრალური დასი ,,რამპა" მონაწილეობას მიიღებს და 24 მაისს, 15:00 საათზე, გახსნის ფესტივალს სპექტაკლით ,,ჩემო კარგო ქვეყანავ". სპექტაკლის სცენარის ავტორი და რეჟისორი – მარი თაბაგარი პროდიუსერი – ლალი მელივა მუსიკალური ხელმძღვანელი – ნინო ბიბილური ქორეოგრაფი – ნათია ხუჭუა ფესტივალზე დასწრება თავისუფალია. წარმატება ჩვენს თეატრალურ დასს!
სრულად
15 მაისი 2025 წელი
საქართველოს საპატრიარქოს წმინდა ნინოს სახელობის მართლმადიდებლური სკოლის გუნდმა წარმატებით გადალახა საქართველოს იუსტიციის სამინისტროს ეროვნული არქივის საგანმანათლებლო პროექტის „საქართველოს პირველი დემოკრატიული რესპუბლიკის“ ნახევარფინალური ეტაპი! ნიკოლოზ მახაშვილმა, ნიკოლოზ შარიქაძემ, ანასტასია ციცქიშვილმა, სანდრო კირკიტაძემ და თორნიკე კუტუბიძემ ღირსეულად წარმოადგინა ჩვენი სკოლა ინტელექტუალურ თამაშში „რა? სად? როდის?“. მათ მიერ ნაჩვენები შედეგი - 12 ქულა შესაძლო 20-დან - საკმარისი აღმოჩნდა იმისთვის, რომ ჩვენი გუნდი 58 საუკეთესო გუნდს შორის მოხვედრილიყო და დამსახურებულად გადასულიყო ფინალურ ეტაპზე. ნახევარფინალში მთელი საქართველოდან 275 სკოლის 1375 მოსწავლე მონაწილეობდა, რაც ამ წარმატებას კიდევ უფრო მნიშვნელოვანს ხდის. ვუსურვებთ ჩვენს გუნდს წარმატებებს ფინალურ ტურში, რომელიც 2025 წლის 30 მაისს თბილისში გაიმართება.
სრულად
14 მაისი 2025 წელი
საქართველოს საპატრიარქოს წმინდა ნინოს სახელობის მართლმადიდებლური სკოლის რუსული ენისა და ლიტერატურის მასწავლებელმა, ემილია ჭუჭულაშვილმა, ჩაატარა ინოვაციური და შთამბეჭდავი გაკვეთილი, რომელიც მიეძღვნა წიგნისა და საავტორო უფლებების საერთაშორისო დღეს. გაკვეთილის ფარგლებში V კლასის მოსწავლეებმა წარმოადგინეს პრეზენტაცია წიგნის განვითარების მრავალსაუკუნოვან გზაზე. მათ დაათვალიერეს, თუ როგორ იქმნებოდა პირველი ხელნაწერები, რა მასალებს იყენებდნენ ძველად, როგორ ჩამოყალიბდა ბეჭდვის ტექნოლოგია და როგორ განვითარდა წიგნის წარმოება თანამედროვე ეტაპამდე. მოსწავლეებმა ასევე შეისწავლეს სხვადასხვა კულტურის წვლილი წიგნის ისტორიაში. განსაკუთრებული ყურადღება დაეთმო წიგნის მნიშვნელობას ცოდნის გავრცელების, კულტურული მემკვიდრეობის დაცვისა და თაობებს შორის კავშირის დამყარების პროცესში. გაკვეთილმა მოსწავლეებს არა მხოლოდ ახალი ცოდნა შესძინა, არამედ აღუძრა წიგნისა და ავტორთა შრომის პატივისცემა. მოსწავლეებმა გამოხატეს დიდი ინტერესი და აღფრთოვანება, რაც ადასტურებს, რომ ასეთ შემოქმედებით და შემეცნებით ღონისძიებებს განსაკუთრებული ადგილი უნდა ეკავოს სასწავლო პროცესში. „წიგნი — ჯადოსნური ფანჯარაა სხვა სამყაროებში“ — ამ სიტყვებით დაასრულეს ბავშვებმა თავიანთი პრეზენტაცია, რაც კიდევ ერთხელ უსვამს ხაზს წიგნის უნიკალურ როლს მათი წარმოსახვისა და გონებრივი ჰორიზონტის გაფართოებაში.
სრულად
09 მაისი 2025 წელი
საქართველოს საპატრიარქოს წმინდა ნინოს სახელობის მართლმადიდებლური სკოლის მუსიკალური გუნდი "იაკამი" ნინო ბიბილურის ხელმძღვანელობით, წარმატებით წარსდგა საქართველოს ბავშვთა და ახალგაზრდული საგუნდო კოლექტივების ეროვნული კონკურსის პირველ ტურზე. ეს პრესტიჟული კონკურსი მიზნად ისახავს აკადემიური საგუნდო სიმღერის პოპულარიზაციას, ეროვნული სასიმღერო ტრადიციების დაცვას, ბავშვთა და ახალგაზრდული საგუნდო კოლექტივების მხარდაჭერასა და განვითარებას, საშემსრულებლო დონის ამაღლებასა და მრავალ სხვა მნიშვნელოვან ამოცანას. კონკურსი ხელს უწყობს საქართველოს საგუნდო კოლექტივების მონიტორინგს, სამუშაო გამოცდილებისა და რეპერტუარის გაზიარებას, შემოქმედებითი კავშირების დამყარებას, ახალი სახელების აღმოჩენას საგუნდო შემსრულებლობაში, ახალგაზრდა ნიჭიერი ქორმაისტერთა წარმოჩენასა და წახალისებას, ასევე ქართველ კომპოზიტორთა შემოქმედების პოპულარიზაციას. სასიხარულოა, რომ კონკურსში მონაწილეობა შეუძლია საქართველოში არსებულ ნებისმიერ საშემსრულებლო კოლექტივს, რომელიც აკმაყოფილებს საკონკურსო პირობებსა და მოთხოვნებს. კონკურსი მოიცავს სხვადასხვა კატეგორიას, მათ შორის აკადემიურ საგუნდო სიმღერას (A), ქართულ ხალხურ სიმღერას (B) და ქართულ გალობას (C), თითოეული კატეგორია კი იყოფა ასაკობრივ ქვეკატეგორიებად. ,,იაკამის" წარმატება კიდევ ერთხელ ადასტურებს ახალი თაობის ნიჭსა და მონდომებას, ასევე, მისი ხელმძღვანელის, ნინო ბიბილურის პროფესიონალიზმს. სკოლის ადმინისტრაცია და პედაგოგები გილოცავთ და გისურვებთ წარმატებას კონკურსის მომდევნო ეტაპებზე! დარწმუნებული ვართ, თქვენ კიდევ არაერთხელ გაგვახარებთ შესანიშნავი შესრულებით!
სრულად
08 მაისი 2025 წელი